Kiungo wa zamani wa Yanga Salum Telela amesaini mtaba wa mwaka mmoja kuitumikia klabu ya Ndanda FC ya mkoani Mtwara.
Telela amesaini mkataba huo leo mchana Julai 25, afisa habari wa klabu hiyo Idrisa Bandali ameiambia shaffihdauda.co.tz kuwa nyota huyo wa zamani wa Yanga amesaini rasmi mkataba wa mwaka mmoja kujiunga na klabu hiyo ya Kusini mwa Tanzania.
“Ni kweli Telela amesaini mkataba wa mwaka mmoja, lakini dau la usajili wake inabaki kuwa siri kati ya mwajiri na mwajiriwa kama yeye mwenyewe alivyotaka iwe,” alisema Bandali wakati nilipotaka athibitishe taarifa hizo kama ni za kweli au la.

Telela aliachwa na klabu ya Yanga baada ya mkataba wake kumalizika na kocha wa klabu hiyo Hans van Pluijm akasema nahodha huyo wa zamani wa timu za taifa za vijana hayuko katika mipango yake katika msimu ujao.